"நீட் விலக்கு போல் ஆளுநர் விலக்கும் சட்டமாக வேண்டும்" --- ஐயா பெ. மணியரசன் தலைவர், தமிழ்த்தேசியப் பேரியக்கம்

 

நீட் விலக்கு போல் ஆளுநர் விலக்கும்

சட்டமாக வேண்டும்.
=================================
ஐயா பெ. மணியரசன்
தலைவர், தமிழ்த்தேசியப் பேரியக்கம்
=================================
இளநிலை மருத்துவப் படிப்பிற்கான அனைத்திந்திய நுழைவுத் தேர்வாக நீட் வைக்கப்பட்டுள்ளது. இது தமிழ்நாட்டிற்குப் பொருந்தாது என்று விலக்கு அளிப்பதற்கான சட்ட முன்வரைவை (மசோதாவை)த் தமிழ்நாடு சட்டப்பேரவை 13.09.2021 அன்று ஒருமனமாக ஆதரித்து நிறைவேற்றியது. ஆனால் கல்வி என்பது இந்திய அரசுக்கும் மாநில அரசுக்கும் அதிகாரம் உள்ள பொதுப் பட்டியலில் இந்திராகாந்தியின் காங்கிரசு ஆட்சியில் மாற்றி அமைக்கப்பட்டதால், இந்திய அரசின் ஒப்புதல் இல்லாமல் அதாவது குடியரசுத் தலைவைரின் ஒப்பம் இல்லாமல் மாநில சட்டமுன்வரைவு சட்டமாகாது. இந்தப் பொதுப்பட்டியல் என்பது இந்திய அரசின் ஒற்றையாட்சி அதிகாரத்திற்கான மாறுவேடப்பட்டியல். அதாவது பம்மாத்துப் பட்டியல்!

தமிழ்நாடு சட்டப்பேரவை நிறைவேற்றிய இச்சட்ட முன்வரைவை ஆளுநர் தமது கருத்துடன் குடியரசுத் தலைவருக்கு அனுப்பி வைக்க வேண்டும். அவர் குடியரசுத் தலைவருக்கு அனுப்பி வைக்கலாம் அல்லது அனுப்பாமல் தன் அலுவலகத்தில் கிடப்பில் போட்டுவிடலாம். எவ்வளவு நாளுக்குள் குடியரசுத் தலைவருக்கு அனுப்ப வேண்டும் அல்லது எவ்வளவு நாள் கிடப்பிலேயே வைக்கலாம் என்று காலவரையறை எதுவும் சட்டத்தில் கிடையாது.

இந்திய அரசமைப்புச் சட்டத்தை உருவாக்கிய இந்திய ஒற்றையாட்சியின் நேயர்கள் - இந்திய ஏகாதிபத்தியவாதத்தின் தாசர்கள் – மாநிலங்களில் உள்ள பல்வேறுபட்ட தேசிய இனங்களை புதுதில்லியின் நிரந்தரக் கட்டுப்பாட்டுக்குள் – நிரந்தரக் கண்காணிப்புக்குள் வைத்திருக்க இச்சைப்பட்டனர். அதற்காக “பொதுப்பட்டியல்” என்ற மாறுவேட ஒன்றியப் பட்டியலை உருவாக்கினார்கள். கூட்டாட்சி உள்ள வடஅமெரிக்கா, செர்மனி, சுவிட்சர்லாந்து போன்ற எந்த நாட்டிலும் பொதுப்பட்டியல் என்று ஓர் அதிகாரப் பட்டியல் கிடையாது. மாநிலப் பட்டியல் கூட்டாட்சிப் பட்டியல் மட்டுமே உண்டு.

நீட்விலக்கு சட்ட முன்வரைவை 13.09.2021இல் தமிழ்நாடு சட்டப்பேரவையில் நிறைவேற்றி அன்றே ஆளுநருக்கு அனுப்பி – அதைக் குடியரசுத் தலைவருக்கு அனுப்புமாறு தமிழ்நாடு அரசு கோரியது. ஆளுநர் ஆர்.என்.இரவி பாசகவின் நீட் தேர்வு ஆதரவாளர். எனவே குடியரசுத் தலைவருக்கு அனுப்பாமல் அச்சட்டமுன்வரைவைக் கிடப்பில் போட்டுவிட்டார். தமிழ்நாட்டில் ஆளுநர் மீது கடும் கண்டனங்கள் எழுந்தன. அதன்பிறகு 142 நாள்கள் கழித்து அந்த முன்வரைவு சரியானதல்ல என்று கூறி தமிழ்நாடு சட்டப்பேரவைக்குத் திருப்பி அனுப்பிவிட்டார்.

அதன்பிறகு, தமிழ்நாடு சட்டப்பேரவையின் சிறப்புக் கூட்டம் கடந்த 08.02.2022 அன்று நடத்தப்பட்டு, பாசகவைத் தவிர மற்ற அனைத்துக்கட்சி உறுப்பினர்களின் ஆதரவுடன் அதே நீட்விலக்கு சட்டமுன்வரைவு நிறைவேற்றப்பட்டது. அது ஆளுநர் இரவிக்கு அனுப்பப்பட்டது. அதையும் கிடப்பில் போட்டு வைத்துள்ளார்.

இந்நிலையில் அந்த சட்டமுன்வரைவை குடியரசுத் தலைவருக்கு அனுப்பிட வலியுறுத்தி முதல்வர் மு.க.ஸ்டாலின் 15.03.2022 அன்று ஆளுநரைச் சந்தித்து கடிதம் கொடுத்துள்ளார். அதன்பிறகு ஆளுநர் குடியரசுத் தலைவருக்கு அனுப்பவதாகக் கூறினார் என்று மு.க. ஸ்டாலின் தெரிவித்துள்ளார்.

நீட் விலக்கு கோரும் தமிழ்நாட்டின் சட்டமுன்வரைவு குடியரசுத் தலைவரால் ஏற்கப்பட்டு சட்டமாகுமா? ஏற்கெனவே 2017 பிப்ரவரி மாதம் இதே நீட் விலக்கு சட்ட முன்வரைவை அஇஅதிமுக ஆட்சி சட்டப்பேரவையில் நிறைவேற்றி ஆளுநருக்கு அனுப்பியது. அப்போதைய ஆளுநர் அதை குடியரசுத் தலைவருக்கு அனுப்பி வைத்தார். குடியரசுத் தலைவர் இராம்நாத் கோவிந் அதற்கு ஒப்புதல் தர மறுத்து, நிறுத்தி வைத்துவிட்டார்.

இப்போது அதே சட்டமுன்வரைவு அதே குடியரசுத் தலைவர் இராம்நாத் கோவிந்துக்கு அதே நரேந்திர மோடி ஆட்சியில் போவதால் சட்டம் ஆகிவிடுமா என்பது பெரும் வினாக்குறி.

நீட்தேர்வு தமிழ்நாட்டுக்குப் பொருந்தாது என்று விலக்குக் கோருவது போல் ஆளுநர் பதவியும் தமிழ்நாட்டுக்குப் பொருந்தாது என்று விலக்கிடும் அரசமைப்புச் சட்டத்திருத்தம் கோரி தமிழ்நாட்டு ஆளும் கட்சியும் மற்ற கட்சிகளும் தமிழ்நாடு சட்டப்பேரவையில் தீர்மானம் நிறைவேற்ற வேண்டும். அதற்காக மக்கள் திரள் எழுச்சிப் பேரணிகளும் இயக்கங்களும் நடத்தினால் எதிர்காலத்தில் பல உரிமைகள் கிடைக்கும்.

=====================================
தலைமைச் செயலகம்,
தமிழ்த்தேசியப் பேரியக்கம்
=====================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=====================================