"திருத்துறைப்பூண்டி-பாங்கல் தோழர் இரா கோவிந்தசாமி அவர்கள் மறைவு பெரும் துயரம் அளிக்கிறது!" --- தமிழ்த்தேசியப் பேரியக்கத் தலைவர் பெ. மணியரசன் இரங்கல்!

திருத்துறைப்பூண்டி-பாங்கல் தோழர்

இரா கோவிந்தசாமி அவர்கள் மறைவு பெரும் துயரம் அளிக்கிறது!
================================================
தமிழ்த்தேசியப் பேரியக்கத் தலைவர் பெ. மணியரசன் இரங்கல்!
============================

இரா. கோ. என்றும் ஆர்.ஜி. என்றும் தோழர்களாலும் நண்பர்களாலும் அன்புடன் அழைக்கப்பட்ட தோழர் இரா. கோவிந்தசாமி (அகவை 84) அவர்கள் உடல்நலக் குறைவால் இன்று (18.7.2024) பிற்பகல் காலமாமானார் என்ற செய்தி பெருந்துயரம் அளிக்கிறது.
கடந்த இரண்டு மாதங்களாக உடல்நலக் குறைவால் பாதிக்கப்பட்டிருந்த தோழர் இரா.கோ. அவர்களை சென்னைக்கு அழைத்துச் சென்று மகன் சதீஷூம் மகள் மங்களகிரிஜாவும் சிகிச்சை அளித்தும் பாதுகாத்தும், பின்னர் இளைய மகள் நளின்-மருமகன் சேகர் பராமரிப்பில் சிதம்பரத்தில் சிகிச்சை அளித்தும் பலன் இன்றி இயற்கை எய்திவிட்டார்.
நானும் தோழர் கி.வெங்கட்ராமன் அவர்களும் சிபிஎம் கட்சியில் முழுநேரமாகச் செயலாற்றியபோது, மார்க்சிய அரசியல் புரிதலின் அடிப்படையில் எங்களுக்குத் தோழர் இரா.கோ. அவர்களுடன் நெருக்கமான தோழமை ஏற்பட்டது.
ஒருங்கிணைந்திருந்த இந்தியக் கம்யூனிஸ்ட்டுக் கட்சியில் தமது கம்யூனிசப் பயணத்தைத் தொடங்கிய இரா.கோ., 1964-இல் சிபிஎம் தலைவர்களோடு இணைந்து அக்கட்சியில் பணியாற்றினார். ஒருங்கிணைந்த தஞ்சை மாவட்டத்தின் ஒன்பது செயற்குழு உறுப்பினர்களில் ஒருவராகச் செயல்பட்டார் இரா.கோ. அவர்கள்! அச் செயற்குழுவில் நானும் செயல்பட்டேன். அங்கும் அவரது மார்க்சியப்பார்வைக்கு ஏற்ற செயல்பாடுகளில்லை; தேடலுக்குத் தீர்வு கிடைக்கவில்லை.
தேசிய இனச்சிக்கல், பிராமணிய ஆதிக்க எதிர்ப்பு, சந்தர்ப்பவாதத் தேர்தல் கூட்டணி எதிர்ப்பு போன்ற மாற்றுச் சிந்தனைகளை முன்வைத்து நாங்கள் தனிக்கட்சி தொடங்க முடிவு செய்தபோது திருத்துறைப்பூண்டியில் பொறியாளர் தோழர் வி. இராமதாசு அவர்களும், தோழர் இரா.கோ. அவர்களும் தனிக்கட்சிக்கு வலுவான பங்களிப்புகளை வழங்கினர். எளிமையும் மார்க்சிய உறுதியும் கொண்டவர் தோழர் இரா.கோ. அவர்கள்.
தமிழ்த்தேசியப் பேரியக்கத்தால், தலைமைச் செயற்குழு, பொதுக்குழு போன்ற பொறுப்புகளில் இருந்து செயல்பட்டார்.
தமிழ்த்சேியப் பேரியக்கத்தின் சில நிலைபாடுகளில் தோழர் இரா.கோ. முரண்பட்டு, பிரிந்து தனிக்கட்சியில் செயல்பட்டார். அந்த நிலையிலும் எங்களிடையே தோழமை உறவும் பாசமும் வற்றாமல் இருந்தது. அவரது மறைவு எமக்குப் பெருந்துயரம் அளிக்கிறது.
நாளை (19.7.2024 அன்று) பாங்கலில் இறுதி நிகழ்வுகள் நடைபெற உள்ளன.
தோழர் இரா.கோ. அவர்களின் மறைவுக்குத் துயரத்தையும், குடும்பத்தார்க்கு ஆறுதலையும் தமிழ்த்தேசியப் பேரியக்கத்தின் சார்பில் தெரிவித்துக் கொள்கிறேன்.
-
பெ. மணியரசன்
தலைவர்
தமிழ்த்தேசியப் பேரியக்கம்.
நாள்: 18-7-2024

"இந்திரா காந்தியின் சனநாயகப் படுகொலை நாள் – சூன் 25. ஐம்பதாண்டு தொடக்கம் – சில நினைவுகள்!" -- பெ. மணியரசன் தலைவர், தமிழ்த்தேசியப் பேரியக்கம்

இந்திரா காந்தியின்

சனநாயகப் படுகொலை நாள் – சூன் 25.
ஐம்பதாண்டு தொடக்கம் – சில நினைவுகள்!
=============================================================
பெ. மணியரசன்
தலைவர், தமிழ்த்தேசியப் பேரியக்கம்

இன்று 2024, சூன் 25! இதே நாளில்தான், 49 ஆண்டுகளுக்கு முன் 1975 சூன் 25 அன்று அன்றைய காங்கிரசுக் கட்சித் தலைமை அமைச்சர் இந்திராகாந்தி, அன்றைய குடியரசுத் தலைவர் பக்ருதின் அலி அகமது மூலம் நெருக்கடி நிலையை அறிவிக்கச் செய்து, இந்திய அரசமைப்புச் சட்டத்தையும், நாடாளுமன்றத்தையும் முடக்கி, ஏடுகளின் உரிமையைப் பறித்து முன்தணிக்கை முறையைத் திணித்து, தொழிற்சங்க உரிமைகளைப் பறித்து, பொதுக் கூட்டம், கருத்தரங்கம், ஊர்வலம், உண்ணாப் போரட்டம், வேலைநிறுத்தம் போன்ற உரிமைகளுக்குத் தடைவிதித்தார்.

இந்திராகாந்தியின் ஊழல் மற்றும் சர்வாதிகார ஆட்சியை எதிர்த்து மக்கள் திரள் போராட்டம் நடத்திவந்த செயப்பிரகாசு நாராயணன், நிறுவனக் காங்கிரசுத் தலைவர் மொரார்ஜி தேசாய், பாசக தலைவர் (அப்போது சனசங்கம்) வாஜ்பாய், அத்வானி, சிபிஎம் மக்களவை உறுப்பினர் ஜோதிர்மாய் பாசு எனப் பல்வேறு எதிர்க்கட்சிகளின் தலைவர்களும், அடுத்தநிலைப் பொறுப்பாளர்களும், தொண்டர்களும், இந்தியா முழுவதும் பல்லாயிரக்கணக்கானோர் அந்த நாளில் சிறைகளில் அடைக்கப்பட்டனர்.

தமிழ்நாட்டில் அப்போது தி.மு.க. ஆட்சி; கலைஞர் கருணாநிதி முதலமைச்சர். இந்திராகாந்தியின் நெருக்கடி நிலை அறிவிப்பை, தி,மு.க.வும் அதன் ஆட்சியும் எதிர்த்தன. நெருக்கடிநிலையை எதிர்த்ததற்காக எவரையும் தி.மு.க. ஆட்சி கைது செயவில்லை.
1971 மக்களவை மற்றும் தமிழ்நாடு சட்டப் பேரவைத் தேர்தலில் இந்திரா காங்கிரசுடன் கூட்டணி சேர்ந்து போட்டியிட்ட திமுக வுக்கும் இந்திரா காங்கிரசுக்கும் இடையே பின்னர் பிளவு ஏற்பட்டது. குறிப்பாக, திமுகவிலிருந்து விலகி எம்ஜிஆர் தனிக்கட்சி தொடங்குவதன் பின்னணியில் தலைமை அமைச்சர் இந்திராகாந்தியும் தமிழ்நாட்டில் இந்தியக் கம்யூனிஸ்டுக் கட்சித் தலைவர் எம். கலியாணசுந்தரமும் இருந்தனர்.
இப்பின்னணியில்தான் திமுக-இந்திரா கங்கிரசுக் கூட்டணி முறிந்தது. இந்த நிலையில்தான் காங்கிரசின் நெருக்கடிநிலை அறிவிப்பை தி.மு.க. எதிர்த்தது.

ஆட்சியில் உள்ள தி.மு.க. எதிர்த்ததால் சிபிஎம் கட்சியில் பணியாற்றிய நாங்களும் மாநிலத் தலைவர்களும் தளைப்படுத்தப்படவில்லை. நெருக்கடி நிலையை எதிர்த்து தமிழ்நாட்டில் கூட்டங்கள் நடத்தினோம். அப்போது ஆகத்து 15 விடுதலை நாள் வந்தது. 14.8.1975 இரவு தஞ்சை நகரில் மருத்துவக் கல்லூரியில் படித்து வந்த தோழர் கே. மணி போன்ற மாணவத் தோழர்களும் நான் உட்பட சில தோழர்களும் சேர்ந்து, நெருக்கடி நிலையைக் கண்டித்து கையால் அழகாக எழுதப்பட்ட சுவரொட்டிகளை ஒட்டினோம்.

“சுதந்திரம் – இரவில் வாங்கினோம்; இன்னும் விடியவே இல்லை”, “சர்வாதிகாரி இந்திராவே ஜனநாயகத்தைக் கொலைசெய்யாதே”, “காங்கிரஸ் சோசலிசம் – நாய்க்கும் மனிதனுக்கும் ஒரே எச்சில் இலையில் உணவு”, “சர்வாதிகாரி இந்திரா ஒழிக!”, “ஜனநாயகம் மீட்போம்” – இப்படிப்பல முழக்கங்கள்!

மறுநாள் தஞ்சை அரண்மனைக் காவல் நிலையத்தில் என்மீது வழக்குப் பதிவு! சில நாள் கழித்துத் தற்செயலாகக் கண்ட காவல் துறையின் உளவுப்பிரிவு தலைமைக் காவலர், என்னைக் கைது செய்யக் காவல் நிலையத்துக்குக் கையைப் பிடித்து அழைத்தார். உதறிவிட்டு மிதிவண்டியில் வேகமாகச் சென்று தப்பினேன்.

அந்நாட்களில் காங்கிரசார் “இந்திராவே இந்தியா – இந்தியாவே இந்திரா” என்று முழக்கம் கொடுத்தனர். இந்திராகாந்தி தன் இளைய மகன் சஞ்சய்காந்தியை இறக்கிவிட்டு, ஆட்சிப் பணியில் இல்லாமலே அதிகார அட்டூழியங்கள் செய்ய வைத்தார். சஞ்சய் காந்தி புதுதில்லியில் நடத்திய வன்முறை தர்பார் கொஞ்சநஞ்மல்ல!

தொழிலாளர்கள் – இலாபக் கணக்குக் காட்டாத தொழிற்சாலைகளில் போனஸ் கேட்கக் கூடாது. இலாபமுள்ள தொழிற்சாலையில் 8.33 விழுக்காட்டிற்கு மேல் போனஸ் கேட்டுப் போராடக் கூடாது. ஆனாலும் இந்திய கம்யூனிஸ்டுக் கட்சியின் அன்றைய குருபீடமான சோவியத் ஒன்றியம் (இரசியா) இந்திராவின் நெருக்கடி நிலையை ஆதரித்தது. எனவே, சிபிஐ கட்சியும் இந்திராகாந்தியின் நெருக்கடி நிலையை ஆதரித்தது.

கருணாநிதி எதிர்ப்பை முதன்மைப்படுத்தி, 1972-இல் அதிமுகவைத் தொடங்கிய எம்ஜியார், இந்திரா காங்கிரசின் நெருக்கடி நிலையை ஆதரித்தார்.

1976 சனவரி 31 அன்று தமிழ்நாட்டின் திமுக ஆட்சியைக் கலைத்து, திமுக தலைவர்களையும் ஆயிரக்கணக்கான தொண்டர்களையும் (கருணாநிதியையும் மற்றும் சில தலைவர்களையும் தவிர்த்து), சிபிஎம் தலைவர்களையும் ஆளுநர் ஆட்சியில் தளைப்படுத்தி சிறையில் அடைத்தார்கள். ஆர்.எஸ்.எஸ். காரர்களையும் சிறையில் அடைத்தார்கள்.

கைதாகாமல் தப்பித்து, தலைமறைவாகக் கட்சிப்பணிகள் செய்ய வேண்டிய தோழர்கள் பட்டியலில் நானும் ஒருவன். எனவே நான் கைதாகவில்லை. ஏராளமான சிபிஎம் தோழர்களைப் பிடித்து, “உங்கள் தலைவர் வெங்கடாசலம் எங்கே” என்று கேட்டு அடித்துத் துன்புறுத்தினர். சிலரைச் சிறையில் அடைத்தனர்.

செய்தித்தாள்கள் முன்கூட்டியே தணிக்கை அதிகாரிகளிடம் மாதிரி நகலைக் கொடுத்து, அவர்கள் மறுக்கும் செய்திகளை நீக்கிவிட்டுத்தான் நாளிதழ் உட்பட வெளியிடமுடியும். நாடாளுமன்றத்தில் எதிர்க்கட்சி உறுப்பினர்கள் பேசியதை ஏடுகள் வெளியிடக் கூடாது. தணிக்கை செய்து நாடாளுமன்ற அலுவலகம் வெளியிடும் பேச்சுகளை மட்டுமே வெளியிட முடியும்.

பொதுக் கூட்டங்கள், ஊர்வலங்களுக்குத் தடை!

இன்றைய தலைமுறை இளையோர் எண்ணிப் பாருங்கள்! எனவே காங்கிரசு சனநாயகப் பறிப்பில் எப்போதும் இச்சை கொண்ட கட்சிதான்! நேருவின் சனநாயகப் பகைச் செயல்களை வேறொரு வாய்ப்பில் அடுக்கலாம்.

1976-இல் நடத்த வேண்டிய மக்களவைத் தேர்தலை இந்திரா காந்தி நடத்தவில்லை. மக்களவையின் வாழ்நாளை நீட்டிக் கொண்டார். பன்னாட்டு அழுத்தங்கள் மூலம் 1977-இல் மக்களவைத் தேர்தல் நடத்தினார். படுதோல்வி கண்டார் இந்திரா காந்தி. சனதாக் கட்சி என்ற பலகட்சிக் கூட்டமைப்பு வென்றது.

காங்கிரசும் இப்போது ஆளும் பாசகவும் சாரத்தில் இந்தி மண்டலத்தின் ஆரியத்துவா அரசியல் கட்சிகள். அவற்றின் குருதியில் சர்வாதிகாரம் உள்ளது. இப்போது 49 ஆண்டுகளுக்கு முன் இந்திரா காந்தி நடத்திய சனநாயகப் படுகொலைகளை மோடி பேசி, சனநாயக வேடம் போடுகிறார். சம்மு-காஷ்மீர் மாநிலத்தையே சிதைத்து ஒன்றியப் பிரதேசங்களாக மாற்றி – அரசமைப்புச் சட்டம் அதற்கு வழங்கிய சிறப்புரிமையைப் பறித்தவர் மோடி! இவர் அரசமைப்புச் சட்ட பாதுகாவலர் போலவும், காங்கிரசு அரசமைப்புச் சட்டத்தைச் சிதைத்த கட்சி என்றும் தந்திரமாக இப்போது பேசுகிறார். சம்முகாஷ்மீர் சிறப்புரிமை 370ஐ மோடி அரசு பறித்ததை, சோனியா – ராகுல்காந்தி காங்கிரசு எதிர்க்கவில்லை. பறித்த வழிமுறையைத்தான் எதிர்ப்பதாகக் கூறினார்கள்.

இந்திய சனநாயகம் முழுமையானது போல காங்கிரசு பாசக மட்டும் அல்ல, இடதுசாரிகள், திராவிடவாதிகள் எனப் பலரும் நடிக்கின்றனர். பலநாடுகளில் உள்ள சனநாயகமும் கூட்டாட்சியும் இந்தியாவில் இல்லை என்பதை ஒப்பிட்டு உணர வேண்டும்!

மாநில அரசுகளுக்கிருந்த விற்பனை வரி உரிமையை இரத்துச் செய்து, இந்திய அரசு ஜிஎஸ்டி வரியைத் திணிப்பதற்கு, அனைத்துத் தயாரிப்புகளையும் செய்தது மன்மோகன் சிங் தலைமையிலான காங்கிரசு ஆட்சி. அதைச் செயல்படுத்தியது பாசக ஆட்சி. மருத்துவக் கல்லூரி மாணவர் சேர்க்கைக்கு நுழைவுத் தேர்வாக நீட் தேர்வைத் தயார் செய்தது மன்மோகன் சிங் ஆட்சி. அதைச் செயல்படுத்தியது மோடியின் பாசக ஆட்சி. மாநில அரசின் ஒப்புதல் இல்லாமலும், அதற்குத் தகவல் தெரிவிக்காமலும் ஒரு மாநிலத்தில் புகுந்து, இந்திய அரசின் காவல்துறை யாரை வேண்டுமானாலும் கைது செய்து கொண்டு போக அனுமதி வழங்கும் என்ஐஏ என்ற தேசிய புலனாய்வு முகமையை உருவாக்கியது காங்கிரசு ஆட்சி. அதைத்தான் பாசக செயல்படுத்தி வருகிறது.

ஆட்சியிலிருந்த காங்கிரசும், ஆட்சியில் இல்லாத பாசகவும் இணைந்துதான் ஈழத்தமிழர்களை இன அழிப்புச் செய்ய சிங்கள வெறியர்களுக்குத் துணைபோயின!

மக்களுக்கு என்னென்ன சனநாயக உரிமைகள் வேண்டும் என்பதை முன்வைத்துதான் 2024 சூலை – ஆகத்து மாதங்களில் “தமிழ்நாட்டைக் காப்போம் - தன்னாட்சி மீட்போம்” என்று பரப்புரை செய்ய உள்ளோம்!

இந்தியாவில் மிகக் கொடூரமாக இந்திரா காந்தி சனநாயகப் பறிப்பு செய்த 50-ஆம் ஆண்டு தொடக்கத்தில் அந்நினைவுகளை உங்களுடன் பகிர்ந்து கொண்டேன்! நன்றி, வணக்கம்!

===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=================================

"கள்ளக்குறிச்சி கள்ளச் சாராயச் சாவுகள்: மு.க. ஸ்டாலின் முதல்வர் பதவியிலிருந்து விலக வேண்டும். டாஸ்மாக்கை நிரந்தரமாக மூடவேண்டும்!" --- தமிழ்த்தேசியப் பேரியக்கத் தலைவர் பெ. மணியரசன் கோரிக்கை!

கள்ளக்குறிச்சி கள்ளச் சாராயச் சாவுகள்:

மு.க. ஸ்டாலின் முதல்வர் பதவியிலிருந்து விலக வேண்டும்.
டாஸ்மாக்கை நிரந்தரமாக மூடவேண்டும்!

====================================================+
தமிழ்த்தேசியப் பேரியக்கத் தலைவர் பெ. மணியரசன் கோரிக்கை!
=====================================================

கள்ளக்குறிச்சியில் பெரும் எண்ணிக்கையில் கள்ளச்சாராயச் சாவுகள் நடந்துள்ளன. 20.6.2024 அன்று மாலை 4 மணிவரை 38 பேர் இறந்துள்ளார்கள்; 102 பேர் மருத்துவ மனையில் சிகிச்சை பெற்று வருகிறார்கள் என்று செய்திகள் வந்துள்ளன.

கள்ளக்குறிச்சியில் காவல்நிலையத்திலிருந்து கூப்பிடு தொலைவில் உள்ள கருணாபுரம் பகுதியில் கள்ளச்சாராய விற்பனை வீடுகள் இருக்கின்றன. அங்குள்ள கண்ணுக்குட்டி, கோவிந்தராசு, தாமோதரன் ஆகியோர் வீடுகளில் தாராளமாகக் கடந்த இரண்டு ஆண்டுகளாகக் கள்ளச்சாராயம் விற்று வருகிறார்கள் என்று அதே கருணாபுரத்தில் உள்ளோர் தொலைக்காட்சி நேர்காணல்களில் கூறுகிறார்கள்.

தமிழ்நாடு அரசின் டாஸ்மாக் சாராயக் கடைகளில் மதுகுடித்துப் பழக்கப்பட்டவர்கள், அங்கு மதுவிலை உயர்ந்துவிட்டதால் மலிவு விலையில் கருணாபுரம் கள்ளச் சாராய வீட்டில் வாங்கிக் குடித்து வந்தார்கள். இங்கு ஒரு பிளாஸ்டிக் பாக்கெட் சாராயம் ரூ.60.00. டாஸ்மாக்கில் ஒரு போத்தல் ரூ140.00 என்கிறார்கள். அதாவது டாஸ்மாக்கில் குடித்துப் பழகியவர்கள், போதிய பணம் இல்லாததால் கள்ளச் சாராயம் குடித்து குடி வேட்கையைத் தணித்துக் கொண்டனர். போதை அதிகமாக வேண்டும் என்பதற்காகக் கள்ளச் சாராய விற்பனை மன்னர்கள், எத்தனால் என்ற போதை இரசாயனத்தை அதிகமாகக் கள்ளச் சாராயத்தில் கலந்து விற்றுவந்தார்கள். இது அளவுக்கதிகமாகச் சேர்க்கப்பட்டதால், நஞ்சாகி கள்ளக்குறிச்சியில் குவியலாக இறப்புகள் நடந்துவிட்டன என்கிறார்கள்.

இவ்வளவு வெளிப்படையாகக் கள்ளக்குறிச்சி நகரத்தில் கள்ளச் சாராயம் இரண்டாண்டுகளாக விற்கப்படுவது காவல் துறைக்கும், மாவட்ட வருவாய்த் துறைக்கும் தெரியாமல் நடக்காது. ஆளுங்கட்சியின் உள்ளூர்க் கேப்டன்கள் ஆதரவுடன்தான் நடந்திருக்க வேண்டும். திமுகவைச் சேர்ந்த மதுஅருந்தாத நல்லவர்கள் அப்பகுதி அமைச்சர்கள் கவனத்திற்கு இந்தக் கள்ளச் சாராய வாணிகத்தைக் கொண்டு சென்றிருப்பார்கள். மேலிருந்து கீழ்வரை ஆளும் கட்சியின் பாதுகாப்பு அரண்களோடுதான் இரண்டாண்டுகளாக அங்கு கள்ளச் சாராய விற்பனை இரவு பகலாக நடந்துள்ளது.

முதலமைச்சர் மு.க. ஸ்டாலின் இப்போது மாவட்டக் காவல் துறை அதிகாரிகள் மீது நடவடிக்கை எடுத்துள்ளார். மாவட்ட ஆட்சியரை மாற்றியுள்ளார். ஆனால், காவல்துறை அமைச்சகத்தைத் தன்வசம் வைத்துள்ள முதலமைச்சர் மு.க. ஸ்டாலின் மீது என்ன நடவடிக்கை? யார் எடுப்பது? தமது குற்றத்தை உணர்ந்து மு.க. ஸ்டாலின் முதலமைச்சர் பதவியிருந்து விலக வேண்டும். திமுகவின் சட்டமன்றக் கட்சி வேறொரு முதலமைச்சரைத் தேர்வு செய்து கொள்ள வேண்டும். அதேபோல் மதுவிலக்குத் துறைக்குப் பொறுப்பு வகிக்கும் முத்துசாமி அமைச்சர் பதவியிலிருந்து விலக வேண்டும்.

உண்மைகளைக் கண்டறிய, மு.க. ஸ்டாலின் ஓய்வு பெற்ற உயர்நீதிமன்ற நீதிபதி தலைமையில் விசாரணைக் குழு அமைத்திருப்பதைக் கலைத்துவிட்டு, நாடறிந்த நடுநிலையாளராக இப்போது பதவியில் உள்ள சென்னை உயர்நீதிமன்ற நீதிபதி ஒருவர் தலைமையில் கள்ளக்குறிச்சி கள்ளச்சாராயக் கொள்ளை - கொலைகள் குறித்து விசாரிக்க விசாரணை ஆணையம் அமைக்க வேண்டும்.

இந்தக் குழுவை அமைத்துவிட்டு முதலமைச்சர் பதவியிலிருந்தும் அரசியலில் இருந்தும் விலகி, தன்னை மு.க. ஸ்டாலின் அவர்கள் தூய்மைப்படுத்திக் கொள்ள வேண்டும் என்று கேட்டுக் கொள்கிறேன்.

அரியலூர் தொடர்வண்டி விபத்து 1956 -ஆம் ஆண்டு ஏற்பட்டு நூற்றுக் கணக்கானோர் உயிரிழந்தபோது, அப்போது அத்துறை அமைச்சராக இருந்த லால் பகதூர் சாஸ்திரி பதவி விலகினார். 1965 இந்தி எதிர்ப்புப் போராட்டத்தில் தமிழ்நாட்டில் 300 க்கும் மேற்பட்டோரைக் காங்கிரசு ஆட்சி சுட்டுக் கொன்றது. அதைக் கண்டித்து அப்போது ஒன்றிய அரசில் காங்கிரசு அமைச்சர்களாக இருந்த சி. சுப்பிரமணியமும், ஓ.வி. அளகேசனும் பதவிவிலகினார்கள். அவர்களைப் பின்பற்றி மு.க. ஸ்டாலின் பதவி விலக வேண்டும்.
அடுத்து, முற்றிலும், நிரந்தரமாக தமிழ்நாடு அரசு டாஸ்மாக் கடைகளைமூடவேண்டும்.
20-6-2024
===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=================================

"கன்னியாகுமரி திருவள்ளுவர் பாறைக்கு விவேகானந்தர் பாறை வழியாகச் செல்லும் கடற்பாலத் திட்டத்தைக் கைவிட வேண்டும்!" ---- தமிழ்த்தேசியப் பேரியக்கத் தலைவர் பெ. மணியரசன் வேண்டுகோள்!

கன்னியாகுமரி திருவள்ளுவர் பாறைக்கு

விவேகானந்தர் பாறை வழியாகச் செல்லும்
கடற்பாலத் திட்டத்தைக் கைவிட வேண்டும்!
=====================================
தமிழ்த்தேசியப் பேரியக்கத் தலைவர்
பெ. மணியரசன் வேண்டுகோள்!
=====================================

கன்னியாகுமரி கடலுக்குள் இருக்கும் வள்ளுவர் பாறைக்கும் வானுயர்ந்த வள்ளுவர் சிலைக்கும் பார்வையாளர்கள் செல்வதற்கு அக்கடலில் உள்ள விவேகானந்தர் பாறையிலிருந்து கடலில் பாலம் அமைக்கும் திட்டத்தைச் செயல்படுத்தத் தமிழ்நாடு அரசு முயல்கிறது என்ற செய்தி கிடைத்தது. தமிழ்நாடு அரசின் சுற்றுலாத் துறை இப்பாலம் அமைக்கும் பணியில் இறங்கியுள்ளதாகத் தெரிகிறது.

திருவள்ளுவர் சிலையை வணங்கவும் பார்க்கவும் செல்வோர் ஆர்.எஸ்.எஸ். கட்டுப்பாட்டில் உள்ள விவேகானந்தர் மண்டபங்களுக்குச் சென்றுதான் செல்ல முடியும் என்ற நிலை வந்தால், ஆர்.எஸ்.எஸ்.காரர்கள், தமிழினப் பேராசான் திருவள்ளுவர்க்குக் காவித் துண்டுகள் அணிவித்து, வள்ளுவர் பாறையைக் காவிமயமாக்கி விடுவார்கள். இப்பொழுது தமிழ்நாட்டில் பல்வேறு இடங்களில் உள்ள திருவள்ளுவர் சிலைக்குக் காவித் துணி போர்த்துவதும், உருத்திராட்ச மாலை இடுவதும், காவி வண்ணத்தில் திருவள்ளுவர் சித்திரங்களை, படங்களைக் காட்சிப் படுத்துவதும் ஆளுநர் மாளிகையிலிருந்து அங்காடித் தெருக்கள் வரை, ஆளுநர் ஆர்.எஸ்.எஸ். இரவி தொடங்கி பா.ச.க., ஆர்.எஸ்.எஸ். பரிவாரங்கள் வரை செய்து வருகின்றனர்.

ஆர்.எஸ்.எஸ். ஆன்மிகப் பாசறையாக இப்போது செயல்பட்டுக் கொண்டிருக்கும் கன்னியாகுமரி விவேகானந்தர் பாறைக்குச் சென்றுதான் திருவள்ளுவர் சிலைப் பாறையை அடைய முடியும் என்ற நிலை ஏற்பட்டுவிட்டால், பேராசான் திருவள்ளுவர் கொள்கைக்குத் தமிழ்நாடு ஆட்சியாளர்களே பெருந்தீங்கு செய்வதாக அமைந்து விடும்.

தமிழ்நாடு முதலமைச்சர் அவர்கள் இதில் தலையிட்டு, விவேகானந்தர் பாறையிலிருந்து திருவள்ளுவர் பாறைக்குப் பாலம் அமைக்கும் திட்டத்தைக் கைவிட்டு, கடற்கரையிலிருந்து நேரடியாகத் திருவள்ளுவர் பாறைக்குக் கடற்பாலம் அமைக்கும் திட்டத்தைச் செயல்படுத்துமாறு கனிவுடன் கேட்டுக் கொள்கிறேன்.

===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=================================

"தலைவர்களோ முழுநேரப் பதவிச் சூதாடிகள்! தமிழர்களோ நாதியற்றவர்கள்! " -- பெ. மணியரசன் தலைவர் தமிழ்த்தேசியப் பேரியக்கம்

தலைவர்களோ முழுநேரப் பதவிச் சூதாடிகள்!

தமிழர்களோ நாதியற்றவர்கள்!
=======================================
பெ. மணியரசன்
தலைவர் தமிழ்த்தேசியப் பேரியக்கம்
=======================================

அன்பார்ந்த தமிழ்ப் பெருமக்களே, வணக்கம்!
கடந்த 2023-லிருந்து 2024 சூன் 10 வரை மக்களவைத் தேர்தல் பரப்புரைகளின் கவன ஈர்ப்புகள், பதைபதைப்புகள் எனத் தொடர்ந்த பலவகை உளவியல் தாக்கங்கள் முடிந்துவிட்டன என்று மூச்சு விட்டிருப்பீர்கள்! அதுவும் மோடி-அமித்சா பேரரசர்கள் இந்தியாவின் எல்லாத் தொகுதிப் பகுதிக்கும் சாலை சர்க்கசுகள் நடத்தி, வாக்கு வேட்டை நடத்துவதற்கு வசதியாக இந்தத்தடவை 19-4-2024-இல்தொடங்கிய வாக்குப் பதிவு இடைவெளிவிட்டு, விட்டு ஏழுகட்டங்களாக 1.6.2024 வரை இந்தியாவின் பல பாகங்களில் நடந்தது.
புதுவை - தமிழ்நாட்டிற்கான வாக்குப் பதிவு 19.4.2024 அன்றே நடந்து முடிந்துவிட்டாலும், மற்ற மாநிலங்களில் நடக்கும் வாக்கு வேட்டைப் பரப்புரைகள், அத்து மீறல்கள், மோடியின் அருவருக்கத்தக்க பேச்சுகள் போன்றவை தமிழ்நாட்டு மக்களின் மனங்களில் கொடூரத் தாக்கங்களை ஏற்படுத்தின.
அப்பாடா தேர்தல் தெருக்கூத்துகள், வசவுகள், வன்முறைகள், கேவலங்கள் முடிந்துவிட்டன என்று பெரு மூச்சு விட்டு, பிற கடமைகளில் தமிழர்கள் இறங்கும் நிலையில், தமிழ்நாடு முதலமைச்சர் - திமுக தலைவர் மு.க. ஸ்டாலின் அடுத்த தேர்தல் பரப்புரையைத் தொடங்கி வைத்துள்ளார். ஆம், 12.6.2024 அன்று மு.க. ஸ்டாலின் வெளியிட்ட அறிக்கை 13.6.2024 அன்று நாளேடுகளில் வந்துள்ளது.
“2026 சட்டமன்றத் தேர்தல் களத்திற்கு இப்போதே ஆயத்தமாக வேண்டும் - தொண்டர்களுக்கு முதலமைச்சர் மு.க. ஸ்டாலின் கடிதம்” என்ற தலைப்பில் தினத்தந்தி 13.6.2024 அன்று ஸ்டாலின் அறிக்கையை வெளியிட்டுள்ளது.
முப்பெரும் விழா என்ற தலைப்பில் கோவையில் நடைபெறும் விழா குறித்தான அறிக்கை இது.
கோவையில் திமுக நடத்தும் மூன்று விழாக்கள் யாவை? 1. கலைஞர் கருணாநிதி நூற்றாண்டு நிறைவுவிழா 2. நாற்பதுக்கு 40 என மக்களவையில் வெற்றி ஈட்டிய தளபதி ஸ்டாலினுக்குப் பாராட்டுவிழா. 3. வாக்களித்த தமிழ் நாட்டு மக்களுக்குப் பாராட்டு விழா! மூன்று விழாக்களில் இரண்டு கலைஞர் குடும்ப விழா! மூன்றாவது வாக்காள வாடிக்கையாளர்களைத் தக்க வைக்கும் விழா!
இந்த விழாவுக்கான அறிக்கையில்தான் அடுக்கடுக்கான, அடுத்த தேர்தல் பணிகள் குறித்து வரிசைப்படுத்துகிறார் ஸ்டாலின்.
”கோவை முப்பெரும் விழாவைத் தொடர்ந்து, விக்கிரவாண்டித் தொகுதியின் இடைத் தேர்தலை எதிர்கொள்ளவிருக்கிறோம். அங்கும் நம் தொடர் வெற்றியினை உறுதி செய்தாக வேண்டும். அதனைத் தொடர்ந்து ஊரக உள்ளாட்சித் தேர்தல் களம் உள்ளது. எல்லாவற்றுக்கும் மேலாக 2026 சட்டமன்றத் தேர்தல் களத்திற்கும் நாம் இப்போதே ஆயத்தமாக வேண்டும்.
“நாற்பதுக்கு நாற்பது என்று நாடாளுமன்றத் தேர்தலில் மகத்தான வெற்றி பெற்றது போல, 2026 சட்ட மன்றத் தேர்தலில் 200க்கும் மேற்பட்ட தொகுதிகளில் வெற்றியினை உறுதி செய்திட, வரும் 15-ஆம் தேதி கோவை முப்பெரும் விழா நமக்கு ஊக்கமளிக்கும் இடமாக அமையட்டும். காணப்போகும் களங்கள் அனைத்திலும் திமுக வெல்லட்டும். கோவை குலுங்கிட கொள்கைத் தீரர்களே திரண்டிடுக!” - தினத்தந்தி 13.6.2024.
எந்நேரமும் தேர்தல் வெற்றி, பதவி பிடித்தல் என்ற வெறி மு.க. ஸ்டாலினுக்கு மட்டும் இருப்பதாகக் கருதக் கூடாது. மோடி, ராகுல், எடப்பாடி எனப் பல தலைவர்களுக்கும் அக்கட்சிகளைச் சேர்ந்த அடுத்த நிலைத் தலைவர்களுக்கும் இதே வெறிதான்!
பாரதியாரின் “நமக்குத் தொழில் கவிதை” என்ற பாடல் வரிகளை அரசியல் தலைவர்கள் பின்வருமாறு கூறுவது போல் மாற்றிக் கொள்ளலாம். “நமக்குத் தொழில் அரசியல், நாட்டைச் சுரண்டுதல், இமைப்பொழுதும் சோராமல் மக்களை ஏமாற்றுவது!”
இந்தியாவில் எப்போது பார்த்தாலும் எங்காவது தேர்தல் நடந்து கொண்டுதான் இருக்கிறது. தமிழ்ப் பெருமக்களே, நீங்கள் எந்தக் கட்சியில் இருந்தாலும், இல்லாவிட்டாலும், பொதுவாக இப்படி சிந்தித்துப் பாருங்களேன்!
இந்தக் கட்சிகளின் தலைவர்கள் தங்களின் தேர்தல் வெற்றிக்குச் செய்கிற திட்டமிடலில், கொடுக்கிற கூட்டு உழைப்பில், இரவுபகலாக அலைவதில் நூற்றில் ஒரு பங்கு, காவிரியில் கர்நாடகம் மேக்கேதாட்டில் அணைகட்டுவதைத் தடுக்க, உச்சநீதமன்றத்தின் 2018 தீர்ப்பின்படி காவிரியில் கர்நாடகம் தமிழ்நாட்டிற்கு தண்ணீர் திறந்துவிடச் செய்ய முயன்றதுண்டா? மக்களைத் திரட்டி மாபெரும் சனநாயகப் போராட்டங்களை நடத்தியதுண்டா?
உச்சநீதிமன்றத்தின் 2014 தீர்ப்பின்படி முல்லைவப் பெரியாறு அணையின் நீட்சியான சிற்றணையை வலுப்படுத்தி 152 அடி உயரம் தண்ணீர் தேக்க ஸ்டாலினோ, எடப்பாடியோ இவர்களின் கூட்டணிக் கட்சியினரோ முயன்றதுண்டா?
தமிழ்நாட்டு மாணவர்களைப் பலிவாங்கிக் கொண்டிருக்கும் நீட் தேர்வில் தமிழ்நாட்டிற்கு விலக்குக்கோரி - தமிழ்நாடு தழுவிய மக்கள்திரள் தொடர் ஆர்ப்பாட்டங்களையோ, சனநாயகப் போராட்டங்களையோ, இவர்கள் எதிர்க்கட்சி வரிசையில் இருக்கும் போதாவது நடத்தியதுண்டா?
மாநில சுயாட்சிக் கோரிக்கைகளில் சிலவற்றை - கல்வியை மீண்டும் மாநிலப் பட்டியலுக்குக் கொண்டு வருதல், ஜிஎஸ்டியை நீக்கி, வணிகவரி வசூல் உரிமையை மீண்டும் மாநிலங்களுக்குக் கோருதல் - வலியுறுத்தி இத்தலைவர்கள் தங்கள் தேர்தல் வேலைகளுக்குக் கட்சியை இறக்கிடும் முயற்சியில் நூற்றில் ஒரு பங்கு செய்ததுண்டா? போராடியதுண்டா?
இப்படி வினாக்களை அடுக்கிக்கொண்டே போகலாம்!
நான் இந்த வினாக்களை எழுப்பும்போது, உங்கள் தமிழ்த்தேசியப் பேரியக்கம் என்ன செய்து கிழித்தது என்று சிலர் கேட்கக் கூடும்.
1. மேக்கேதாட்டு அணைகட்டும் இடம் நோக்கிப் போய் மறியல் செய்வதற்காக 7.3.2015 அன்று காவிரி உரிமை மீட்புக்குழு சார்பில் 5000 உழவர்களுடன் தேன்கனிக் கோட்டையிலிருந்து என் தலைமையில் புறப்பட்டோம். அப்போதைய அதிமுக ஆட்சி எங்களைத் தடுத்து, தளைப்படுத்தி மூன்று வெவ்வேறு மண்டபங்களில் காவலில் வைத்தது. தொலைக்காட்சியில் பெருந்திரளாக உழவர்கள் கைதாவதைப் பார்த்துவிட்டு அன்றைய எதிர்க்கட்சித் தலைவர் கலைஞர் கருணாநிதி மிகவும் வியந்து பாராட்டி அறிக்கை வெளியிட்டார். அன்றே தொலைக் காட்சிகளில் அது ஒளிபரப்பானது. மறுநாள் ஏடுகளில் வந்தது.
காவிரிக்காக எத்தனையோ மக்கள் திரள் போராட்டங்கள் நடத்தினோம். அப்போதிருந்த காவிரித் தீர்ப்பாயத்தைக் கலைத்துவிட்டு, அது கொடுத்திருந்த இறுதித் தீர்ப்பையும் கைவிடும் முயற்சியில் இறங்கியது பாசக ஆட்சி! நீராற்றல் துறை அமைச்சர் உமாபாரதி நாடாளுமன்றத்தில் இதற்கான சட்டமுன்வரைவு ஒன்றை விவாதத்திற்கு வைத்திருந்தார். நடைமுறையில் செயல்பாட்டில் உள்ள காவிரித் தீர்பாயத்தை (Cauvery Tribunal) இரத்துச் செய்து இந்தியா முழுமைக்குமான ஒற்றைத் தீர்ப்பாயம் அமைக்க முன்மொழியப்பட்ட சட்ட முன்வரைவு அது! காவிரி உரிமை மீட்புக்குழு சார்பில் என் தலைமையில் உழவர்கள் தஞ்சை மாவட்ட ஆட்சியர் அலுவலகம் முன் 19 நாட்கள் (2019 மார்ச்சு 28 முதல்) இரவுபகலாகக் காத்திருப்புப் போராட்டம் நடத்தினோம். அப்போதைய அதிமுகவின் வேளாண்மை அமைச்சர் துரைக்கண்ணு, முன்னாள் அமைச்சர் வைத்தியலிங்கம் ஆகியோர் வந்து பார்த்து ஆதரவு தெரிவித்தனர். திமுக தலைவர்களில் ஒருவரான டி.ஆர்,பாலு மூன்று மாவட்ட திமுக சட்டமன்ற உறுப்பினர்களுடன் வந்து பார்த்து ஆதரவு தெரிவித்தார். காங்கிரசுத் தலைவர்கள் திருநாவுக்கரசர், ஜி.கே. வாசன், சிபிஐ தலைவர் நல்லகண்ணு முதலியோர் உட்பட அனைத்துக் கட்சித் தலைவர்களும் வந்து பார்த்து வாழ்த்திப் பேசினர். இந்திய ஒன்றிய அரசின் மேனாள் திமுக அமைச்சர் எஸ்.எஸ். பழனிமாணிக்கம் அவர்கள் அடிக்கடி வந்துபார்த்து, மாநிலங்களவை உறுப்பினர்கள் கனிமொழி, டி. ராஜா (சிபிஐ) ஆகியோரிடம் பேசி, உமாபாரதி முன்மொழிந்த தீர்மானத்தை மாநிலங்களவை விவாதத்திற்கு எடுக்காமல் தடுக்குமாறு கோரினார்.
மாநிலங்களவையில் விவாதத்திற்காக வைக்கப்பட்டிருந்த அந்த சட்ட முன்வரைவு விவாதிக்கப்படாமலேயே கிடப்பில் போடப்பட்டது. அந்த சட்டமுன்வரைவு மறுபடி வந்து விவாதித்து, சட்டமாகி, இந்தியா முழுமைக்குமான ஒற்றைத் தீர்ப்பாயம் பின்னர் அமைக்கப்பட்டது. ஆனால் அதற்குள் காவிரித்த தீர்ப்பாயத் தீர்ப்பின் அடிப்படையில் உச்சநீதிமன்றம் காவிரித் தீர்ப்பை 2018-இல் வழங்கிவிட்டது; தப்பித்தோம்!
தமிழ்நாட்டில் உள்ள இந்திய அரசு நிறுவனங்களில் 90 விழுக்காடு வேலை தமிழர்களுக்கே அளிக்க வேண்டும் என்று பலகட்டங்களில் பெருந்திரள் மறியல் போராட்டங்கள் நடத்தி, இக்கோரிக்கையைத் தமிழ்த்தேசியப் பேரியக்கம்தான் பிரபலப்படுத்தியுள்ளது. கடந்த ஆண்டு ஓசூர் அருகே டாட்டா மின்னணுத் தொழிற்சாலையில் இந்திக்காரர்களைத் தனித் தொடர் வண்டியில் கொண்டு வந்து வேலைக்கும் சேர்த்துக் கொண்டு, மண்ணின் மக்களாகிய தமிழர்களைப் புறக்கணித்து வந்தனர். தடையை மீறி அங்கு டாட்டா ஆலை முன் மாபெரும் மக்கள் திரள் முற்றுகைப் போராட்டம் நடத்தி, ஆண்களும் பெண்களுமாக 650 பேர் கைதானோம். போராட்டம் அறிவித்த உடனேயே மாவட்டங்களில் டாட்டா நிறுவனம் தனிவேலைவாய்ப்பு முகாம்கள் நடத்தித் தமிழர்களை வேலையில் சேர்த்தது. இப்பணியை அப்போது திமுக செய்ததா? அதிமுக செய்ததா? வேறு யாராவது செய்தார்களா? தமிழ்த்தேசியப் பேரியக்கம் செய்தது!
தஞ்சையில் பேரரசன் இராசராசன் எழுப்பிய பெருவுடையார் கோயில் குடமுழுக்குகள் வடமொழியில் மட்டுமே நடந்து வந்தன. 5.2.2020 அன்று நடந்த பெருவுடையார் கோயில் குடமுழுக்கில் தமிழ் ஓதுவார் ஒருவரைக் கோயில் கோபுரத்தில் ஏற்றிக் கோபுரக் கலசத்தில் புனித நீர் ஊற்றச் செய்து, தமிழ் மந்திரம் சொல்ல வைத்தோம்! அறிவிப்பாளர் “ஆயிரம் ஆண்டுகளுக்குப் பிறகு பெருவுடையார் கோபுரக் கலசத்தின் முன் தமிழ் ஒலிக்கிறது” என்று அறிவித்தார். தமிழ்த்தேசியப் பேரியக்கம் முன்னெடுத்து, தமிழர் ஆன்மிகப் பெருமக்களும் ஆதரித்ததாலும், மதுரை உயர்நீதிமன்றம் வழங்கிய தீர்ப்பாலும் இச்சாதனையை நிகழ்த்த முடிந்தது. இப்படி இன்னும் எத்தனையோ சாதனைகள். இதனை, தமிழின் பெருமை பேசியே ஆட்சி அதிகாரத்தைக் கைப்பற்றிய திராவிடக் கட்சிகள் செய்யவில்லை.
இவற்றுக் கெல்லாம் சிகரம் வைத்தது போல், தமிழ்த்தேசியம் என்ற கருத்தியலை - இன அரசியல் முழக்கத்தை முன்வைத்து 1990 களில் இருந்து பரப்பி வருவது எமது தமிழ்த் தேசியப் பேரியக்கத்தின் பெருஞ்சாதனை!
எத்தனையோ தடவை சிறையடைப்புகள், எம் தோழர்கள் மீது காவல் துறையினரின் தடியடிகள், காயங்கள்!
களத்தில் நின்று தமிழ்மொழி தமிழ் இனம், தமிழ்நாடு ஆகியவற்றின் உரிமைகளுக்குப் போராடிக் கொண்டே, ஈகங்கள் செய்து கொண்டேதான் மேற்படி தேர்தல் கட்சிகள் நடத்தும் கள்ளவணிக அரசியலைத் தோலுரித்து வருகிறோம்! பதவி-பணம்-விளம்பரம் மூன்றுக்கும் ஆசைப்படாத இலட்சிய வீர்களாய் மக்களைத் திரட்டிப் போராடி வருகிறோம்.
கட்சிசார்பற்ற, கட்சிக் கொடிகளற்ற தன்னெழுச்சி மக்கள்திரள் போராட்டங்களே தமிழ்நாட்டில் ஏறுதழுவுதல் (சல்லிக்கட்டு) உரிமையை மீட்டன, மீத்தேன் எடுப்பதைத் தடுத்துக் காவிரி மண்டலத்தைப் பாதுகாக்கப்பட்ட வேளாண் மண்டலம் ஆக்கின; தூத்துக்குடி நச்சு ஸ்டெர்லைட் ஆலையை நிரந்தரமாக மூடச் செய்தன! இதற்கான போராட்டத்தில் 13 பேர் காவல்துறையினரால் சுட்டுக் கொல்லப்பட்டனர். இவற்றில் திமுக, அஇஅதிமுக போன்ற கட்சித் தலைமைகளுக்கு எந்தப் பங்களிப்பும் இல்லை! தூத்துக்குடி ஸ்டெர்லைட் ஆலைப் போராட்டத்தில் 13 தமிழர்களைச் சுட்டுக்கொன்றதில்தான் எடப்பாடி ஆட்சியின் முத்திரை பதிந்துள்ளது.
திமுக, அஇஅதிமுக உள்ளிட்ட தேர்தல் கட்சிகள் போராடிச் சாதித்தவை யாவை? சட்டமன்ற, நாடாளுமன்றங்களில் வாதாடிச் சாதித்தவை யாவை? மக்கள் வரிப்பணத்தில் தரும் இலவசங்கள் மட்டுமே அவற்றின் சாதனைகள்! டாஸ்மாக் சாராயக் கடை திறந்து மக்களில் கணிசமானோரை குடிகாரர்களாக மாற்றி சமூகத்தைக் குட்டிச்சுவராக்கியிருப்பதே அவர்களின் சாதனை!
தேர்தல் வழியில் கிடைக்கும் பதவிகளை அடையும் தன்னல நோக்கில், தேர்தல் போர்களத் தளபதிகள் வேடமிட்டு வாக்காளர்களைத் தூண்டிவிடும் வசனங்களை ஸ்டாலின், எடப்பாடி வகையாறாக்கள் பேசித்திரிகின்றனர்! எப்போதும் தேர்தல் போட்டி மனநிலையிலேயே மக்களை இவர்கள் வைக்கிறார்கள்! காவிரி, முல்லைப் பெரியாறு அணை, பாலாறு, தென்பெண்ணை ஆறுகள் முதலியவற்றைக் காக்க இக்கட்சிகள் மாபெரும் மக்கள் திரள் போராட்டங்களைத் தொடர்ந்து நடத்தியதுண்டா? இல்லை!
தமிழ்த்தேசியப் பேரியக்கம் மற்றவர்களைச் சாடி விமர்சனம் மட்டுமே செய்து கொண்டிருக்கும் திண்ணைப்பேச்சு வீரர்களைக் கொண்ட இயக்கமல்ல! முழுநேர விமர்சன விற்பன்னர்களின் முகாம் அல்ல! தமிழின உரிமை மீட்புக் களப் போராளிகளின் அறிவாயுதப் பாசறை! அதே வேளை அரசியல் சூதாடிகளை அம்பலப்படுத்தி மக்களை விழிப்படையச் செய்யும் செயற்களப் பாசறை! இத்தகைய அடித்தளத்தின் மீது நின்று கொண்டுதான் இந்தத் திறனாய்வுகளைச் செய்துள்ளேன். அன்புக்குரிய தமிழ்ப் பெருமக்களே, சிந்தியுங்கள்!
===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=================================