"மனிதர்கள் நெருங்கி இருந்தாலும், மனங்கள் விலகி நிற்கின்றன! ---- திருமண விழாவில் தமிழ்த்தேசியப் பேரியக்கத் தலைவர், பெ. மணியரசன் வாழ்த்துரை!

மனிதர்கள் நெருங்கி இருந்தாலும்,

மனங்கள் விலகி நிற்கின்றன!
====================================================
திருமண விழாவில் தமிழ்த்தேசியப் பேரியக்கத் தலைவர்,
பெ. மணியரசன் வாழ்த்துரை!
====================================================

தஞ்சை மாவட்டம், தஞ்சாவூர் வட்டம் சூரக்கோட்டை செல்வன் பா. அர்ச்சுன் எம்.ஏ. பி.பி.எட். - பனையக்கோட்டை செல்வி க. சபிகா எம்.சி.ஏ. ஆகியோர் திருமணம் 26.5.2024 அன்று தமிழ்த்தேசிய முன்னேற்றக் கழகத்தின் பொதுச் செயலாளர் வழக்றிஞர் த.சு. கார்திகேயன் அவர்கள் தலைமையில் சிறப்பாக நடந்தது. தமிழ்த்தேசியப் பேரியக்கத் தலைவர் பெ. மணியரசன் அவர்கள் அத்திருமணத்தை நடத்தி வைத்து ஆற்றிய வாழ்த்துரையின் எழுத்து வடிவம் :

மொட்டு விரிந்து மகரந்தம் மோதிச் சிதறுகின்ற இரட்டை மலர்களைப் போல் இணைந்திருக்கும் மணமக்களை நெஞ்சு நிறைந்த மகிழ்வுடன் வாழ்த்துகிறேன். இரண்டு கோட்டைகள் இங்கு இணைந்துள்ளன. மணமகன் அர்ச்சுன் சூரக்கோட்டை, மணமகள் சபிகா பனையக்கோட்டை. இரு கோட்டைகளும் இணைந்து ஒரு பெருங்கோட்டையாய் இல்லறம் நடத்த வாழ்த்துகிறேன்.

மணமக்கள் இருவரும் உயர் கல்வி கற்றவர்கள். மணமகன் எம்.ஏ.பி.பி.எட். படித்துள்ளார், மணமகள் எம்.சி.ஏ. படித்துள்ளார். உங்களைப் படிக்க வைத்த பெற்றோரைப் பாராட்டுகிறேன்.

நம்முடைய முன்னோர்கள்தாம் இரண்டாயிரம் ஆண்டுகளுக்கு முன்பே, கணவனும் மனைவியும் குடும்பம் நடத்துவதை இல்லறம் நடத்துவது என்று அறத்துடன் இணைத்துச் சொன்னார்கள். மனையறம் என்பார்கள். ஆங்கிலம் போன்ற மொழிகளில் இல்லறம் என்பது போன்ற சொற்கோவை இல்லை. துறவு பூணுவதும் அறம்; அது துறவறம்! குடும்பம் நடத்துவதும் அறம். இது இல்லறம்!

அறம் என்பதில் அன்பு, அரவணைப்பு, உதவி எனப் பல பண்புகள் உண்டு. அதே வேளை தீங்கினை எதிர்க்கும் அறச்சீற்றமும் உண்டு!

ஒரு குடும்பம் என்பது ‘தன்னலச் சொந்த வாழ்வு‘ என்று சுருக்கிக் கருதக்கூடாது. உலகெங்கும் உள்ள மக்கள் அவரவர்க்கேற்ற, அவரவர்க்கு வாய்த்த வகையில் சமுதாயத்துடன் இணைந்து வாழ்வதே மனித வாழ்க்கை.

சமுதாயமாகத்தான் மனிதர்கள் வாழமுடியும். தனிமனிதர் தனியே வாழ்ந்துவிட முடியாது. அப்படிப்பட்ட சமுதாய வாழ்க்கையின் அடிப்படை அலகு - basic unit - குடும்பம். ஒரு குடும்பத்தில் இருப்போரெல்லாம் ஒரே குருதிவழியைச் சேர்ந்த குடும்பம் அல்ல. எங்கிருந்தோ ஒரு மனைவி - ஒரு கணவன் - ஒரு மருமகள், ஒரு மருமகன் வரலாம். அவர்கள் மாமனார் மாமியார், மைத்துனர், மைத்துனியுடன் இணைந்து குடும்பமாகலாம்.

“யாயும் ஞாயும் யாராகியரோ
எந்தையும் நுந்தையும் எம்முறைக் கேளிர்;
யானும் நீயும் எவ்வழி அறிதும்,
செம்புலப் பெயல்நீர் போல
அன்புடை நெஞ்சந் தாம்கலந் தனவே”

என்னும் குறுந்தொகைப் பாடல் காதலன்-காதலிக்கு மட்டும் பொருந்துவதல்ல; பெற்றோர் பார்த்து திருமணம் செய்து வைத்த இணையருக்கும் பொருந்தும்.


இப்படி உருவாகும் உறவுதான் சமூக உறவுக்கான அடிப்படை அலகு. ஒரு சமுதாயத்தின் அடிப்படை யூனிட்.

சமூக இணைப்புக்கான - இயக்கத்திற்கான தகவல் தொழில் நுட்பக் கருவிகள் வியக்கத்தக்க வகையில் வளர்ந்துவிட்டன, பெருகிவிட்டன. மனிதர்களுக்கிடையே உள்ள பௌதிகத் தொலைவுகள் - சடப்பொருள் தொலைவுகள் ஒன்றுமில்லை என்று ஆகிவிட்டன. ஐயாயிரம் கிலோ மீட்டருக்கு அப்பால் உள்ள ஒருவருடன் காணொலி-வீடியோ மூலம் - கைபேசிகளில் நேரடியாகப் பார்த்துப் பேசிக் கொள்கிறோம். இன்னும் எவ்வளவோ கருவிகள் எங்கெங்கோ இருப்போரை மிகமிக நெருக்கமாக நேருக்கு நேராகக் கொண்டு வந்துவிட்டன. ஆனால் மனித மனங்களை அப்படி நெருக்கமாக இந்தக் கருவிகளால் இணைக்க முடியவில்லை.

தகவல் தொழில்நுட்ப வளர்ச்சியால், மனிதர்கள் மிக அதிகமாகப் பன்முகச் செய்திகள் தெரிந்து கொள்கிறார்கள். இது ஒரு வகை ஆணவத்தையும் (Ego) அந்தரங்க உளவியலில் உண்டாக்கிவிடுகிறது. நிறையப் பேர் படித்தவர்களாக, உயர் கல்வி கற்றவர்களாக இருக்கிறார்கள். ஆனால், மனிதநேயமும், மனவளர்ச்சியும் குறைந்துள்ளன.

அடுத்த வீடு அயல்நாடுபோல் முறைத்துக் கொண்டு இருக்கிறது. பக்கத்து வீடு பகை நாடுபோல் இருக்கிறது. அவ்வளவு ஏன், ஒரு குடும்பத்துக்குள்ளேயே பேசிக் கொள்ளாத உறவுகள் இருக்கின்றனவே! பௌதிக வடிவில்-சடப்பொருளாக மனிதர்களுக்கிடையே நெருக்கம் இருக்கிறது. ஆனால் மனங்களுக்கிடையே இடைவெளியும், தொலைவும் அதிகம்!

இந்த மனத்தொலைவு - மனவிலகல் ஒரு குடும்பத்திற்குள் - ஓர் ஊருக்குள் - ஒரு தாயகத்திற்குள் அதனதன் அளவில் இருக்கின்றன.

ஓர் ஊரை எடுத்துக் கொள்ளுங்கள் - தெருக்கள் தனித்தனி தீவுகள் போல் மனத்தளவில் இருக்கின்றன. சண்டையில்லை; வம்பு இல்லை; மோதல் இல்லை; ஆனால் மனத்தீவுகள் தனித்தனியே இருக்கின்றன. பொருட்கள் மனதிற்கு நெருக்கமாகிவிட்டன. குறிப்பாக நுகர்வுப் பொருட்கள் சகமனிதர்களைவிட அதிக மனநெருக்கம் பிடித்துவிட்டன. மனிதர்களை விடப் பொருட்கள் மீதான ஈர்ப்பு, ஈடுபாடு அதிகமாகிவிட்டது. சக மனிதர்களைப் போட்டியாளர்களாகப் பார்க்கும் பார்வை அதிகரித்துவிட்டது. வாழ்க்கையும் ஒரு வணிகம் என்றாகிவிட்டது. மனித உறவுகள் வணிக உறவுகள்போல் ஆகிவிட்டன! மணமகள் பணம் கொடுத்து மணமகனை வாங்கும் அவலம் அக்ரகாரத்திலிருந்து நம்மிடம் தொற்றிவிட்டது.

தமிழர் வணிகம் ஒரு காலத்தில் அறம் பிறழாமல் நடந்தது. அதற்கான இலக்கியச் சான்றுகள் ஏராளமாக நம் தமிழில் இருக்கின்றன. அதெல்லாம் மாறி மற்றநாடுகளைப் போல் தமிழ்நாட்டிலும் வணிகம் ஒரு சூதாட்டம்போல் ஆகிவிட்டது.

மணமக்கள் அரச்சுனும், சபிகாவும் ஒருவருக்கொருவர் பாசமும் பற்றுதலும் கொண்டு வாழவேண்டும். குடும்ப உறவுகளைப் பேண வேண்டும். கணவனுக்கும் மனைவிக்கும் பிணக்கு வந்தால், அந்தக் கோபம் தணிந்தபின் கணவனோ மனைவியோ முந்திக்கொண்டு பேசி இருவரும் இயல்பு நிலையைப் பேண வேண்டும். பிணக்கின்போது, முதலில் பேசி தோற்கக் கூடாது என்ற பிடிவாதம் கணவனுக்கும் கூடாது; மனைவிக்கும் கூடாது.

“ஊடலில் தோற்றவர் வென்றார் அதுமன்னும்
கூடலில் காணப் படும்”

என்றார் நம் பேராசான் திருவள்ளுவர்.

கணவன் மனைவிக்கிடையே பிணக்கு வந்தால் பேசிக் கொள்ளமாட்டார்கள்.
நேரம் கடந்த பிறகோ, மறுநாளோ இருவரும் பேச விரும்புவர். ஆனால் முந்திப் போய் பேசித் தோற்கக் கூடாது என்று பிடிவாதம் காட்டுவார்கள். அங்கே நம் தாத்தா திருவள்ளுவர் தலைநீட்டுகிறார். கணவன்-மனைவிக்கிடையே பிணக்கு வந்தால், முந்திப்போய் பேசி பிணக்கைத் தீர்ப்பவர்தான் உண்மையில் அந்தச் சண்டையில் வென்றவர் ஆவார் என்கிறார். (அந்நேரம் மணமகள் சபிகா ‘ஆமாம் ஆமாம்‘ என்பது போல் தலையசைத்தார்)

இங்கே மனம் குறித்து நான் பேசிய கருத்துகள் மணமக்களுக்கு மட்டுமல்ல, நம் அனைவருக்கும்தான். நாம் அனைவரும் தமிழர்களாய் மனதால் நெருங்கி உறவு கொள்ள வேண்டும்.

மணமக்களுக்கு மீண்டும் நெஞ்சு நிறைந்த வாழ்த்துகள்!

===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
================================= 

"யானைகள் வழித்தடம்! ஜக்கியிடம் சரணாகதி! கூடலூரில் குடும்பங்கள் வெளியேற்றல்!" ----- தமிழ்த்தேசியப் பேரியக்கத் தலைவர் பெ. மணியரசன் கண்டனம்!

யானைகள் வழித்தடம்!

ஜக்கியிடம் சரணாகதி!
கூடலூரில் குடும்பங்கள் வெளியேற்றல்!
=========================================================
தமிழ்த்தேசியப் பேரியக்கத் தலைவர் பெ. மணியரசன் கண்டனம்!
=========================================================

யானைகள் வழித்தடம் என்று புதிதாக இடங்களை, தமிழ்நாடு அரசின் வனத்துறை அடையாளப்படுத்தி, நீலகிரி மாவட்டம் கூடலூர், பந்தலூர் பகுதிகளில் உள்ள மலைப்பகுதிக் கிராமங்களில் வாழும் மக்களை, வீடுகளைக் காலி செய்து வெளியேறச் சொல்லி தமிழ்நாடு அரசு அதிகாரிகள் நெருக்கடிகள் கொடுத்து நிர்ப்பந்திப்பது மிகமிகக் கொடுமையாக உள்ளது.

அவர்கள் பெரும்பாலும் 1960-களில் சிறிமாவோ-சாஸ்திரி; இலங்கை-இந்திய ஒப்பந்தப்படி இலங்கையிலிருந்து வெளியேற்றப்பட்ட மலையகத் தமிழர்கள் ஆவார்கள். அவர்களை நீலகிரி மாவட்டத் தேயிலைத் தோட்டங்களில் வேலை செய்வதற்காகவே அங்கு கொண்டுவந்து அப்போதைய ஆட்சியாளர்கள் குடியமர்த்தினார்கள். அரசின் டான்டீ (Tan Tea) தேயிலைத் தோட்டங்கள் இதற்காகவே உருவாக்கப்பட்டன.
அந்த இலங்கை மலையகப் பகுதிகளில் இருந்து வந்த தமிழ்நாட்டு வம்சாவழித் தமிழர்களில் ஒரு பகுதியினர்தாம் கூடலூர், பந்தலூர் வட்டங்களில் - கொளப்பள்ளி, சூண்டி போன்ற பல பகுதிகளில் வசிக்கிறார்கள். காவல்துறையினரை வைத்துக் கொண்டு அவர்களை வலுக்கட்டாயமாக வெளியேற்ற ஆட்சியாளர்கள் முயல்வது கொடுமையானது.

அவர்கள் தங்கள் வீடுகளுக்கு வரிகட்டுகிறார்கள். வாக்காளர் அட்டை பெற்றுள்ளார்கள். கால்துறையினரைப் பயன்படுத்தி அவர்களை வெளியேற்ற ஆட்சியாளர்கள் முயற்சிப்பது வன்மையாகக் கண்டிக்கத் தக்கது. கூடலூர், பந்தலூர் வட்டங்களில் வாழும் பொது மக்கள்-பாதிக்கப்பட்ட மக்களுக்கு ஆதரவாகவும், அவர்களை வலுக்கட்டாயமாக வெளியேற்றுவதைக் கண்டித்தும், தங்கள் வீடுகளில், கடைகளில் கருப்புக்கொடிகட்டி எதிர்ப்பைத் தெரிவித்து வருகிறார்கள். அங்குள்ள தமிழ்த்தேசியப் பேரியக்கத் தோழர்களும் இந்தக் கருப்புக் கொடி-கண்டன இயக்கத்தில் பங்கு கொள்கிறார்கள்.
கோவை மாவட்டம் வெள்ளியங்கிரி மலைப்பகுதியில் யானை வழித்தடங்களை வாங்கி, மதில்கள் கட்டி மாளிகைகள் எழுப்பியுள்ளார் ஈஷா அதிபர் ஜக்கி வாசுதேவ்! அவர் ஆக்கிரமித்துள்ள நிலப்பகுதியும் அவர்கள் கட்டியுள்ள கட்டடங்களும் யானைகளின் வழித்தடங்களை ஆக்கிரமித்தவையாக உள்ளதால், அக்கட்டு மானங்களை அகற்றவேண்டும் என்று நீதிமன்றம் தீர்ப்புக் கொடுத்தும், வனத்துறை சார்பில் அவரின் ஆக்கிரமிப்புகளை அகற்ற எச்சரிக்கை அறிவிப்புக் கொடுத்தும் அவற்றை அப்புறப்படுத்த மறுக்கிறார்கள் தமிழ்நாட்டு ஆட்சியாளர்கள்.

ஆனால், ஏழை எளிய உழைப்பாளிகளின் வீடுகளை இடிக்க ஜேசிபியுடன் செல்கிறார்கள். ”ஏழையின் சிரிப்பில் இறைவனைப் பார்க்கிறோம்” என்பது திமுக ஆட்சியாளர்களின் பொன்மொழி. ஆனால், கூடலூர், பந்தலூர் பகுதிகளில் திமுக ஆட்சியாளர்கள் ஏழையின் அழுகையில் ஏதேச்சாதிகாரம் செலுத்துகிறார்கள். அவர்கள் வெள்ளியங்கிரி மலையில் ஜக்கியின் சிரிப்பில் சரணாகதி அடைகிறார்கள்!
இதே காலத்தில் ஒகேனக்கல் நடுத்திட்டுப் பகுதியில் 70ஆண்டுகளாக வசித்துவரும் மீன்பிடித் தொழில் கொண்ட மக்களின் வீடுகளைக் காலிசெய்யச் சொல்லி காவல்துறையுடன் அதிகாரிகள் நடத்திய வன்முறை வன்கொடுமையாகும். பெண்களும் ஆண்களும் கண்ணீர்விட்டுக் கதறக்கதற அவர்களின் வீடுகளின் ஓடுகளைப் பிரித்துக் காலி செய்த கொடுமை அரங்கேறியது.

அம்மக்கள் ஊட்டமலைப்புகுதியில் மாற்று இடம் கொடுத்தால் வீடுகளை நாங்களே பிரித்து எடுத்துக்கொண்டு போய்விடுகிறோம் என்று கேட்கிறார்கள். ஆனால் அதிகாரிகள், நாற்பது கிலோ மீட்டருக்கு அப்பால் தருமபுரி அருகே வீட்டுமனை தருகிறோம் என்கிறார்கள். இவர்கள் மீன்பிடித் தொழில் செய்பவர்கள். காவிரிக்குத் தொடர்பில்லாத பகுதியில் மனை கொடுத்தால் இவர்கள் வருமானத்திற்கு என்ன செய்வார்கள்?
தமிழ்நாடு முதலமைச்சர் அவர்கள் தமது அரசின் மேற்படி முடிவுகளைக் கைவிட்டு, கூடலூர், பந்தலூர், ஒகேனக்கல் மக்கள் வீடுகளைக் காலி செய்யாமல், அவர்களின் வாழ்வுரிமையைக் காக்குமாறு தமிழ்த்தேசியப் பேரியக்கம் சார்பில் கேட்டுக் கொள்கிறேன்.

===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=================================

"வாழ்த்தியோருக்கு வணக்கங்கள்!" --- பெ. மணியரசன் தலைவர், தமிழ்த்தேசியப் பேரியக்கம்

===================================================== 

வாழ்த்தியோருக்கு வணக்கங்கள்!

பெ. மணியரசன்
தலைவர், தமிழ்த்தேசியப் பேரியக்கம்
=====================================================

பேரன்புடையீர்,
வணக்கம்! எனக்கு 77 அகவை நிறைவுற்று 78-இல் நேற்று - 10.5.2024-இல் அடி எடுத்து வைத்துள்ளேன். நேரிலும், அலைபேசியிலும், சமூக ஊடகங்களிலும் எனக்கு வாழ்த்துகள் வழங்கிய அன்பு உள்ளங்கள் அனைத்திற்கும் மனம் நெகிழ்ந்த நன்றியைத் தெரிவித்துக் கொள்கிறேன்.

வழக்கம்போல் இவ்வாண்டும் என் பிறந்த நாளில் விடியற் காலையிலேயே என் கைபேசியை அணைத்து வைத்துவிட்டேன். தொலைபேசியில் வாழ்த்த முயன்று, முடியாமல் போன அன்பு உள்ளங்களிடம் மன்னிப்புக் கேட்டுக் கொள்கிறேன்.

அலைபேசியை அணைத்து வைப்பதற்கான முதற்காரணம், வாழ்த்துகளைக் கேட்பதில் எனக்கொரு கூச்சம் இருப்பதுதான். அலட்சியமோ, ஆணவமோ அல்ல என்பதைத் தெரிவித்துக் கொள்கிறேன். இரண்டாவது காரணம் என்னால் தொடர்ந்து ஒரு நாள் முழுக்கத் தொலைபேசியில் பேச இயலாது. களைப்பும், சோர்வும் வந்துவிடும்.

அரசியல் தலைவர்கள், தமிழ்த்தேசியப் பேரியக்கத் தோழர்கள், தமிழ்த்தேசியக் குடும்ப உறவுகள்-குழந்தைகள், தோழமை இயக்கங்கள்-அமைப்புகளின் தோழர்கள், எமது அரசியல் நிலைபாட்டில் மாற்றுக் கருத்து கொண்ட நண்பர்கள், தோழர்கள் மற்றும் சான்றோர்கள், பெரியவர்கள் எனப் பலரும் எனக்கு வாழ்த்துகள் கூறியுள்ளனர். பாவலர்கள் பலர் வாழ்த்தி எழுச்சிக் கவிதைகள் வழங்கியுள்ளனர்.

தமிழ்த்தேசியப் பேரியக்கத்தின் ஊடகப் பிரிவுப் பொறுப்பாளர்கள் எனது அரசியல் பயணம் பற்றி ஏற்கெனவே எடுத்த ஆவணப்படங்கள் மற்றும் காட்சிகளை ஊடகங்களில் மறு ஒளிபரப்பு செய்துள்ளனர்.

அனைவர்க்கும் என் நெஞ்சு நிறைந்த நன்றிகள் !

தமிழ்த்தேசியம், தமிழ்த்தேச இறையாண்மை என்ற இலக்கை நோக்கியே எஞ்சிய என் பயணம் தொடரும்! மனிதர்கள் அனைவரும் சமம், தமிழர்கள் அனைவரும் சமம், ஆணும் பெண்ணும் சமம், இதுவே தமிழர் அறம்!

பெ. மணியரசன்
===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
=================================

"வடலூர் வள்ளலார் பெருவெளியை அழிக்காதீர்" வேண்டுகோள் ஆர்ப்பாட்டத்தைத் தடுத்த தமிழ்நாடு அரசின் எதேச்சாதிகாரத்திற்குக் கண்டனம்!" --- தமிழ்த்தேசியப் பேரியக்கத் தலைவர் பெ. மணியரசன் அறிக்கை!

 "வடலூர் வள்ளலார் பெருவெளியை அழிக்காதீர்"

வேண்டுகோள் ஆர்ப்பாட்டத்தைத் தடுத்த
தமிழ்நாடு அரசின் எதேச்சாதிகாரத்திற்குக் கண்டனம்!
===========================================
தமிழ்த்தேசியப் பேரியக்கத் தலைவர்
பெ. மணியரசன் அறிக்கை!
===========================================

வடலூர் வள்ளலார் சத்திய ஞானசபைப் பெருவெளியை அழித்து, பன்னாட்டு மையக் கட்டுமானங்களை எழுப்பும் தி.மு.க. ஆட்சியின் ஆன்மிகச் சீரழிவு வேலைகளை நிறுத்தக் கோரியும், வடலூர் பெருவெளியை வள்ளலார் ஆன்மிகத்திற்கு ஏற்ப பெருவெளியாகக் காக்கக் கோரியும் 04.05.2024 சனிக்கிழமை மாலை 3 மணியளவில் வடலூர் பேருந்து நிலையம் அருகில் அறவழியில் ஆர்ப்பாட்டம் நடத்துவது என்று நாம் தமிழர் கட்சி, தமிழ்த்தேசியப் பேரியக்கம், தெய்வத் தமிழ்ப் பேரவை, வீரத்தமிழர் முன்னணி, வள்ளலார் பணியகம், சன்மார்க்க சபைகள் சார்பில் அறிவித்திருந்தோம். முறைப்படி காவல்துறை அனுமதியும் கோரி இருந்தோம்.

கடைசி நேரத்தில் காவல் துறையினர் அனுமதி மறுத்ததுடன் நாம் தமிழர் கட்சி, தமிழ்த்தேசியப் பேரியக்கம் ஆகிய அமைப்புகளைச் சேர்ந்த பொறுப்பாளர்களை தமிழ்நாடெங்கும் வீட்டுக் காவலில் வைத்தும் சிலரை காவல் நிலையத்திற்குக் கொண்டு சென்று காவலில் வைத்தும் தமிழ்நாடு காவல்துறையினர் எதேச்சாதிகாரம் செய்துள்ளார்கள். இவ்வாறான சனநாயகப் பறிப்பைச் செய்யுமாறு காவல்துறையை ஏவியோர் தமிழ்நாட்டு ஆட்சியாளர்களே! என் வீட்டிற்கு முன் காவல் வாகனத்தை நிறுத்திக் கொண்டு என்னைக் கைது செய்ய தயாரானார்கள்.

சேலம் மாவட்டம் - மேச்சேரி - தமிழ் வேத ஆகமப் பாடச்சாலைத் தலைவர் சிம்மம் சத்தியபாமா அம்மையார் அவர்களையும் அவருடன் வடலூர் வந்த ஆண்கள் - பெண்கள் 50 பேரையும் சிதம்பரத்தில் வழிமறித்து கைது செய்து மண்டபத்தில் வைத்துள்ளார்கள். இதுபோல் பலரையும் ஆங்காங்கே கைது செய்துள்ளார்கள்.

தமிழ்நாட்டு ஆட்சியாளர்களின் வள்ளலார் பெருவெளி அழிப்பு முரட்டுத்தனத்தையும் சனநாயக வழி ஆர்ப்பாட்டத்தைத் தடுக்கும் சர்வாதிகாரத்தையும் தமிழ்த்தேசியப் பேரியக்கம், தெய்வத்தமிழ்ப் பேரவை, வீரத்தமிழர் முன்னணி மற்றும் வள்ளலார் சபைகள் சார்பாக வன்மையாகக் கண்டிக்கிறேன்.

இதே ஆர்ப்பாட்டத்திற்கு நீதிமன்றத்தில் அனுமதி வாங்கி வடலூரில் மாபெரும் எழுச்சியுடன் நடத்துவோம்!

உழைப்பு, நிதி, பலவற்றைச் செய்த நண்பர்களுக்கும் அன்பர்களுக்கும் செலவு செய்து வடலூர் வந்து திரும்பிக் கொண்டிருக்கும் பெருமக்களுக்கும் நெஞ்சம் நிறைந்த பாராட்டுகளையும் நன்றியையும் தெரிவித்துக் கொள்கிறேன்!

===============================
தலைமைச் செயலகம்,
தமிழ்த்தேசியப் பேரியக்கம்
=================================
பேச: 9443918095, புலனம் : 9841949462
முகநூல் : www.fb.com/tamizhdesiyam
ஊடகம் : www.kannottam.com
இணையம் : www.tamizhdesiyam.com
சுட்டுரை : www.twitter.com/Tamizhdesiyam
காணொலிகள் : youtube.com/Tamizhdesiyam
================================= 

கு